Në një kohë kur çmimet dhe taksat janë rritur ka ende shqiptarë që paguhen me 24 mijë lekë në muaj edhe pse lodhen të paktën për 8 orë në punë në ditë. Nuk janë pak, por 1 në 4 të punësuar që pagoi sigurime shoqërore në 2018 deklaroi pagë 24 mijë lekë në muaj. Në 2018 në raport me vitin 2017 numri i atyre që sigurohen me pagë minimale ka rënë me 3%. Rënia sipas të dhënave zyrtare të Institutit të Sigurimeve Shoqërore mësohet të këtë ardhur si pasojë e daljes nga skema e rreth 23 mijë të vetëpunësuarve, të cilët siguroheshin me paga minimale.

Kategoria e dytë më e madhe që paguan sigurimeve janë punonjësit me pagë 60-95 mijë lekë në muaj. Kjo kategori punonjësish zë 17% të kontribuesve dhe kryesisht përfaqësohet nga punonjës të administratës publike dhe punonjës të njësive vendore.
Numri i personave që paguajnë sigurime për këtë kategori page u rrit me 0.5% në raport me vitin 2017, dhe kjo erdhi kryesisht prej rritjes së pagave në sektorin shtetëror.
Kategoria e tretë më e madhe për numrin e punonjësve me sigurime janë ta që marrin 24-30 mijë lekë në muaj. Kjo kategori zë 15.1% të totali të punonjësve që paguan sigurime gjatë vitit të kaluar.
Më pas për numrin e lartë të kontribuesve vjen kategoria e pagave nga 30.001-40 mijë lekë në muaj, të cilët zënë 13% të totalit të kontribuesve.
Ndërsa vetëm 4.7% e kontribuesve paguajnë sigurime shoqërore për një pagë mujore më të lartë se 120 mijë lekë.
Sipas të dhënave të INSTAT në vitin 2018 numri mesatar i të punësuarve ishte mbi 1.3 milionë, por numri mesatar i atyre që paguanë kontribute tek sigurimet për efekt pensioni ishte 778.111 persona.
Gjithashtu vërehet se rreth 360 mijë persona që numërohen si të punësuar, nuk kanë paguar sigurime.