Është arrestuar në Gjermani Arbër Çekaj, pronar i “Arbri Garden” i cili akuzohet si porositës i kontenierit me banane, ku u kapën 613 kg kokainë.

Arrestimi i tij u bë nga policia gjermane në një provincë në Dyserdorf.

Policia e shtetit shpalli në kërkim ndërkombëtar Arbër Çekaj, pronarin e shoqërisë “Arbri Garden” i cili kishte porositur kontenierin me banane nga Kolumbia brenda të cilit u gjet dhe sekuestrua sasia rekord prej 613 kg kokainë. Droga e ardhur nga Kolumbia me vlere 180 mln euro, ishte e fshehur në një kontenier me fund të dyfishtë që ishte mbushur me banane, dhe kishte destinacion tregun europian.

Gjykata e Krimeve të Rënda ka vendosur masën e sigurisë arrest me burg për Cekaj.

Droga mbërriti në portin e Durrësit më 19 shkurt ndërsa operacioni për sekuestrimin e saj u ndërmor mbrëmjen e 27 shkurtit në Maminas.

Vetëm dy ditë përpara ndërhyrjes së policisë, Arbër Çekaj ishte larguar bashkë me familjen në drejtim të Gjermanisë.

Gjatë operacionit të koduar Last Snow ku u kap edhe sasia rekord e kokainës u arrestua shoferi dhe menaxheri i firmës Donaldo Lushaj dhe Armando Pezaku.

Destinacioni i kokainës ishin tregjet evropiane, ndërkohë që mendohet se Çekaj ka bashkëpunuar edhe me disa persona të tjerë për transportimin e drogës nga Kolumbia drejt Shqipërisë.

Sot ambasadori amerikan Donald Lu gjatë një aktiviteti  kërkoi  arrestimin e Çekajt, ndërsa ministri i Brendshëm Fatmir Xhafaj nga Lezha paralajmëroi një operacion policor në Gjermani dhe një tjetër në Spanjë.