Ylli portugez, Cristiano Ronaldo ka tronditur Real Madridin, pasi thuhet se dëshiron të largohet nga Spanja.
Ronaldo ka qenë ylli kryesor i “Mbretërve” vitet e fundit, duke qenë pjesë përbërëse e skuadrës që hyri në histori duke fituar dy trofe të Ligës së Kampionëve radhazi, teksa edhe tre “Topa të Artë”.
Megjithatë, nga vendlindja ka ardhur një lajm shumë i papritur ku thuhet se ylli portugez dëshiron të largohet nga kampionët spanjollë.
Është gazeta sportive portugeze “A Bola” që ka publikuar lajmin bombastik për yllin e Real Madridit dhe dëshirën e tij për tu larguar.
Arsyeja e këtij largimi thuhet se vjen pas akuzave të vazhdueshme për evazion fiskal prej 14.5 milionë euro.
Sipas A Bola, Ronaldo, thuhet se tashmë i ka treguar edhe presidentit të klubit, Florentino Perez që dëshiron të largohet nga skuadra, ndërsa Reali mendohet se është gati të marrë në konsideratë oferta mbi 180 milionë euro për portugezin.
Skuadrat e interesuara për shërbimet e Ronaldos janë Monaco, PSG, Manchester United dhe dy skuadra kineze që nuk i janë publikuar emrat.