Dashnor Deliallisi, 36-vjeçari që shkaktoi aksidentin tragjik në autostradën Tiranë-Durrës në afërsi të Sukthit teksa qarkullonte në krah të kundërt  dyshohet të ketë patur në makinë drogë.

Ekspertët e aksidenteve kanë rindërtuar edhe një herë skenën e ngjarjes, ndërsa policia nga ana e saj po shqyrton hipotezat e mundshme se çfarë e shtyu “kamikazin” të futej në kundërvajtje. Duke ditur që ky i fundit jetonte në Durrës dhe i njihte mirë rrugët e qytetit, është përjashtuar dyshimi fillestar për një gabim të mundshëm njerëzor.

Kohët e fundit, Deliallisi ishte nën monitorimin e policisë për shkak të përfshirjes së tij në veprimtari kriminale në Belgjikë, në fushën e trafikut të drogës dhe prostitucionit. Burime nga grupi i hetimit bënë të ditur per Panorama, se ai mbahej në vëzhgim prej disa kohësh (edhe për shkak të jetës së tij luksoze dhe makinave mbi 100 mijë euroshe që kishte në përdorim).

Madje, sipas burimeve, në disa raste automjetet e tij ishin bërë objekt kontrolli të policisë pasi dyshohej se pasuria e tij ishte produkt i përfshirjes në një grupi kriminal ndërkombëtar në fushën e narkotrafikut. Pikërisht kontrollet e herëpashershme të policisë në mjetet e tij dyshohet të jetë bërë shkak që ai të merrte përsipër “çmendurinë” e tri ditëve më parë, duke u futur kundërvajtje në autostradë, me qëllim shmangien e postbllokut të përhershëm në dalje të Urës së Dajlanit.

Kjo ngre dyshime të forta se i riu ka marrë përsipër një risk të tillë për shkak se me makinën e tij ka qenë duke transportuar një sasi të konsiderueshme droge dhe se në mjet mund të ketë pasur edhe armë. Megjithatë, burimet mohojnë që të jetë gjetur diç­ ka e dyshimtë në mjet, çka ngre dyshime se ai mund ta ketë hedhur rrugës. Sidoqoftë, asgjë nuk konfirmohet zyrtarisht. “Largimi me shpejtësi, duke mos iu bindur urdhrit të policisë për të ndaluar, të lë përshtypjen se drejtuesi nuk ka dashur të përballet me policinë.

Dyshojmë se ai ka tentuar të largohet, pasi fshinte diçka në automjetin e tij. Ishte mjet i ri dhe normalisht i pajisur me dokumentacionin e duhur.

Çfarë e shtyu të mos i ndalonte policisë?! Ai mund të ketë pasur me vete armë ose drogë, që i ka hedhur nga makina teksa lëvizte me shpejtësi. Megjithatë janë bërë kontrolle paraprake dhe nuk është gjetur asgjë e hedhur në rrugë dhe as jashtë saj”, thanë burime nga policia. Sipas kësaj të fundit, Dashnor Deliallisi është futur në kundërvajtje tek Ura e Dajlanit. Ai nuk i ndaloi postbllokut duke ecur kundërvajtje për 13 km.

Një makinë që ishte para mjetit të tri vajzave që gjetën vdekjen në aksident mund të kishte pësuar të njëjtin fat. Por ai ka arritur ta shmangë “kamikazin” që i doli para, pasi fatmirësisht ka pasur fushëpamje. Ndërsa shoferja 23­-vjeçare Greta Sherifi dhe as 36­-vjeçari Deliallisi nuk kanë pasur fushëpamje, pasi përplasja ka ndodhur në një pozicion kthese.