Steroidi, hormoni Boldemec shkakton rritjen e nivelit të estrogjenit. Hormoni në këtë rast shkakton rritje në peshë, shtim të forcës, por ka pasoja edhe për shëndetin riprodhues.

Hormoni i rrezikshëm, steroidi i njohur me emrin Boldemec, po qarkullon lirisht në tregun shqiptar. Me këtë produkt të ndaluar në vendet e bashkimit prej më shumë se një dekade, është hormoni i përdorur gjerësisht nga fermerët, por edhe i shitur e i kërkuar në farmacitë vendase.

Pas investigimit të “Balkan Insight” bëhen publike fakte të reja të lidhura me pasojat që kanë qytetarët që konsumojnë mish të rritur me hormone, që theret i njomë dhe konsumohet nga qytetarët si i vendit, produkt bio, ndërkohë që mishi i shërbyer në tavolinë, përveç se produkt i rritur artificialisht, është tepër i dëmshëm për organizimin.

Steroidi shkakton impotencë, por edhe ulje të aftësisë së riprodhimit, pra shkallës së fertilitetit te meshkujt.

Te femrat nuk ka pasoja për fertilitetin. Ndërkohë që kjo sasi estrogjeni ndikon drejtpërdrejt në aktivitetin seksual të meshkujve”, tha mjeku androlog  Evi Dani. Sipas specialistit, substanca të tilla kanë pasoja deri në sterilitet dhe ulje të fertilitetit, mundësisë për të pasur pasardhës.

Për pesë vite me radhë, autoritetet shqiptare kanë lejuar importin dhe përdorimin e bagëtisë së majme, nëpërmjet hormonit të njohur si Boldemec LA.

Përbërësi kryesor është një steroid i quajtur Boldenone, i krijuar për përdorim veterinar, kryesisht për trajtimin e kuajve.

Sportistët

Pavarësisht kësaj, sportistët shpeshherë e përdorin atë për doping, si dhe ata që merren me badibillding, e përdorin po ashtu për rritjen e peshës dhe vendosjen e muskujve.

Sportistët e përfshirë në disa skandale dopingu në Shtetet e Bashkuara të Amerikës, duke përfshirë këtu kryesisht kampionatet e futbollit, bejsbollit, boksit e kanë marrë hormonin në fjalë. Pavarësisht dekreteve shqiptare mbi përdorimin e hormoneve, Boldemec LA gjendet në listën e lejuar të barnave veterinare për vite me radhë. Ekspertët sqarojnë se konsumi i mishit të rritur me Boldenone mund të jetë i rrezikshëm në një kohë të gjatë, për shëndetin e qytetarëve.

Reagimi

Një ditë pas investigimit që provon se hormoni i mishit me efekte kancerogjene, Boldemec, mund të blihet me lehtësi në farmacitë veterinare në vend, Ministria e Bujqësisë deklaron se janë ngritur grupe pune për kontrollin e rreptë të depove farmaceutike veterinere. “Këto ditë ne kemi kaluar në kontrolle të imtësishme në të gjithat depot farmaceutike. Shumë shpejt do të ngrihet një grup pune për të bërë inventarët më të imëta të të gjithë depove farmaceutike. Do të marrim masa ndaj atyre që fusin këto hormone”, tha Sotiraq Papa, përgjegjës i shërbimit veterinar në Ministrinë e Bujqësisë.

Ndalimi

Përdorimi i hormonit Boldemec është i ndaluar përmes dy vendimeve të Ministrisë së Bujqësisë, një i vitit 2006 dhe një tjetër i vitit 2011. Por, me gjithë masat e marra për kontrollin e tij, përgjegjësi i shërbimit veterinar pranë Ministrisë së Bujqësisë, Sotiraq Papa, tha se kontrabanda është vështirë të kontrollohet. “Mbetje të Boldemec të vitit 2010 mund të kenë mbetur në farmaci jo të licencuara. Mund të jenë farmaci që përdoren nga veterinerë privatë me një gamë të vogël medikamentesh. Ne nuk e kemi kapacitetin për ta kontrolluar gjithë kontrabandën”, deklaroi Papa. Pak ditë më parë, Autoriteti Kombëtar i Ushqimit siguroi konsumatorët shqiptarë se mishi që tregtohet në vend është i sigurt, ndërsa përjashtoi mundësinë e përdorimit të hormoneve për rritjen artificiale të tyre.