Ambasadori i SHBA-ve në Greqi Geoffrey Pyatt shprehu ditën e hënë shqetësim lidhur me privatizimin e portit të Selanikut dhe tha se Uashingtoni po ndjek me vëmendje përmirësimin e klimës së investimeve në Greqi. Duke folur në konferencën e ekonomisë greke të organizuar nga Dhoma amerikane-hebraike e Tregtisë në Athinë, diplomati amerikan tha se investitorët amerikanë kanë për qëllim të pozicionohen në Greqi dhe 2018 duket se po bëhet një vit referimi në marrëdhëniet greko-amerikane. “Ekathimerini” citon ambasadorin amerikanë të ketë thënë se "ne jemi duke parë nëse janë krijuar kushtet e duhura për investime në Greqi. Shpresojmë që mesazhi i kryeministrit Alexis Tsipras që "Greqia është kthyer" të jetë i vërtetë”. Pyatt pranoi se ai ka folur me një numër rekord investitorësh të mundshëm këtë vit dhe se qeveria ka ndërmarrë disa hapa të rëndësishëm, por burokracia mbetet një problem dhe një shqetësim serioz për investitorët. Ambasadori iu referua investimeve të vazhdueshme në Greqi që po krijojnë shqetësim, duke përmendur, në veçanti, privatizimin e Autoritetit Portual të Selanikut (OLTH). Ai tha se identiteti i investitorëve në objektin e portit të veriut mbetet i paqartë, siç është edhe origjina e financimit të tyre. Përkundrazi, tha ai, ka shembuj pozitivë si koncesioni i 14 aeroporteve rajonale në Fraport Greqi. Ofertuesi i preferuar për 67 për qind të aksioneve në OLTH është një konsorcium i formuar nga Deutsche Invest Equity Partners, Terminal Link dhe Belterra Investments në Francë, në pronësi të sipërmarrësit ruso-grek Ivan Savvidis, i cili gjithashtu duket të jetë burimi kryesor i financimit të projektit.