Eshtë ndarë nga jeta në moshën 103-vjeçare aktori legjendar i Hollywood-it, Kirk Douglas.

Me më shumë se 92 role, përfshirë 75 filma, Douglas konsiderohet superylli më i madh i të gjitha kohërave.

Lajmin e dhimbshëm e ka dhënë djali i tij Michael me anë të një postimi në Facebook, i cili përveç statusit të gjatë kishte publikuar dhe shumë foto të ndryshme të aktorit ndër vite.

“Për mua dhe vëllezërit e mi Joel dhe Peter ai ishte thjesht një baba, për Catherinen, një vjehërr i mrekullueshëm, për nipërit dhe stërnipërit e tij një gjysh i mirë, kurse për gruan e tij Anne, një burrë i mrekullueshëm. Jeta e Kirkut ishte e përmbledhur, ai la pas një trashëgimi filmash që do t’i mbeten gjeneratave që do të vinë, një histori si një filantropist i njohur i cili punon për të ndihmuar njerëzit për të sjellë paqe në planet”, shtoi Michael.

“Me lejoni ta përfundoj me fjalët që ia thashë atij në ditëlindjen e tij të fundit dhe të cilat gjithmonë janë të vërteta. ‘Baba-Të dua shumë dhe jam shumë krenar që jam djali yt”, shkruante Michael. Kirk Douglas ka lindur në shtetin e New York në 9 dhjetor 1916, në një familje rusesh analfabet. Ai më pas vazhdoi studimet duke punuar si kamarier, për të vazhduar në fund si drejtor në Akademinë e Arteve Dramatike.