Barcelona rrëmben gjithçka edhe këtë sezon në Spanjë, duke mposhtur në finale Sevillan gola të Jordi Albas dhe Neymar në kohën shtesë.  28 Kupa të Mbretit, më shumë se askush tjetër.Katalanasit rrezikuan shumë përballë andaluzianëve në “Vincente Calderon” ku luajtën për rreth 50 minuta me 1 lojtarë më pak, por arritën të ruanin qetësinë duke e çuar ndeshjen në kohën shtesë pas 90 minutave pa asnjë gol. Shkëndijën e parë e dha Messi në minutën e 6, ndërsa Sevilla replikoi me Coke në të 17-ën.

Skuadrat u barazuan në numër lojtarësh vetëm në fundin e ndeshjes kur Banega u ndëshkua me të kuq pas ndërhyrjes ndaj LIonel Messit në hyrje të zonës së rreptësisë por kapiteni katalanas nuk arriti të ekzekutonte saktësisht goditjen e dënimit duke e çuar ndeshjen në kohën shtesë. 9 minuta nga rifillii i ndeshjes, Sevilla reflektoi lodhjen në këmbët e saj pasi linja mbrojtëse u kap në befasi nga asisti i Mesit për Jordi Alban që arriti ta ndalte topin në rrjetë.

Ishte Neymar ai qe dyfishoi pak momente me pas. Minutat deri në fund nuk dhuruan asgjë më shumë. Katalanasit konfirmohen dominues në Spanjë ku edhe Sevilla nuk arriti t’u rrëmbente trofeun e dytë më të rëndësishëm, duke u mjaftuar vetëm me suksesin në Europa League. 28 Kupa Mbreti për Barcelonën që lë pas Athletic Bilbaon me 22 dhe Realin e Madridit me 19.