Kryetari i Partisë Demokratike, Lulzim Basha duket se është i vendosur për nisjen e procesit të Vettingut në politikë. Basha ka publikuar një video ku rendit “5 fakte”, që sipas tij, duhet të dihen nga publiku, për Vettingun në politikë.

“5 gjërat që duhet të dini për Vetingun për Politikanet:

Vetingu është skaner për Deputetë, Ministrat dhe zyrtarët e .artë në Shqipëri. Përfshirë këtu edhe vetë Kryeministrin.

Vetingu do largojë politikanë që kanë lidhje me grupe me rekorde të tmerrshme kriminale.

Vetingu do të largojë politikanët që nuk e justifikojnë pasurinë e tyre.

Vetingu duhet të parashikohet në Kushtetutë dhe të miratohet nga 93 deputetë.

PD ka depozituar draftin në Kuvend në datën 7 Shtator 2018”- sqarohet në videon e shpërndarë nga kreu i opozitës.

Partia Demokratike ka depozituar dje në Parlament ndryshimet kushtetuese, me anë të të cilave kërkohet t’i nënshtrohen procesit të Vettingut të gjithë politikanët, duke filluar nga Kryeministri, ministrat, deputetët dhe drejtuesit e institucioneve kushtetuese, të cilët janë emëruar nga Parlamenti. Edhe kryeministri Edi Rama është shprehur i gatshëm që procesi i Vettingut në politikë të nis nga ai dhe familja e tij.