Lulzim Basha ka vijuar me akuzat ndaj kryeministrit Rama. Teksa dha një intervistë në emisionin “Fakt” të drejtuar nga Çim Peka, Basha ka akuzuar Ramën, si të lidhur me trafikun e drogës.
Basha thotë se ka prova për implikimin e Ramës. Sipas tij, tani Ramën nuk e shpëton dot më as vetë Zeusi.

“Banditët në burg dhe jo në qeveri. Kjo është ajo që ne kërkojmë sot. Sot lajmi i ditës është që 1 në 10 fëmijë ha një vakt në ditë. Këto janë pasoja të Ramës me krimin.
Zgjedhjet e 25 qershorit provuan se paktin me krimin vazhdoi. Ky është realiteti që kemi 49 % të shqiptarëve që nuk paguajnë faturat e ujit dhe të dritave.
Ne jemi për banditët në burg dhe populli në qeveri. Sot shikova një raport për fëmijët e kequshqyer. Sot ne kemi një aleancë mes Edi Ramës dhe Krimit. Rama është armik i zgjedhjeve të lira, sepse ai ka bërë pakt me krimin. Nuk mund të jesh edhe me krimin edhe me qytetarët.
E gjitha kjo ka ardhur për një arsye të thjeshte, sepse ne kemi një qeveri të krimit nuk kemi një qeveri të qytetarët. Edi Rama është koka e drogës.
Kjo nuk do të thotë se Rama merret me trafikun e skafëve natë për natë, por se ai është me një aleancë të mirëmenduar me krimin. Ai ka bërë aleancë me ta, ai i solli në parlament, ai u bëri një ministër të Brendshëm dhe ai ua la Shqipërinë zonë të lirë.
Kam indicie shumë të forta se ai është i inkriminuar në kuptimin individual penal. Kam një mesazh për të gjithë nga kjo studio se nuk ka prokuror, nuk ka prokuror të përkohshëm, as Zeus, që e shpëton atë nga largimi dhe nga përgjegjësia politike. Zgjidhja me Ramën nuk ka kompromis, zgjidhja është largimi i tij”, tha Basha.
“Unë dhe Partia Demokratike kemi qëndruar fuqishëm dhe gjithçka që kemi thënë ne ka dalë e vërtetë. Besueshmëria e PD dhe e Bashës si kryetar i saj është përtej çdo dyshimi. Këtë betejë do e vazhdojmë deri në fitore”, tha Basha.
“Mos besoni se hapja e dosjes së Tahirit e shumë të tjera janë rastësi. Në çdo kancelari europiane e kanë të qartë se PD ka thënë të drejtën dhe tani ka nisur ora e rënies së narkoshtetit. Asnjë përpjekje e PD nuk ka shkuar dëm”, vijoi ai.