Kryetari i Partisë Demokratike Lulzim Basha, nuk është kthyer në Shqipëri pas vizitës në Parlamentin Europian. Lideri i opozitës është nisur përtej Atlantikut, për një vizitë zyrtare në SHBA. Sipas njoftimit të shpërndarë për shtyp nga selia blu, Basha do të takohet me zyrtarë të lartë të administratës dhe politikës amerikane. Mësohet se kreu i demokratëve gjatë kësaj vizite, shoqërohet nga një delegacion që ka në përbërje deputetët Gent Strazimiri, Jorida Tabaku dhe Eduart Selami si dhe kryetarin e Partisë Republikane Fatmir Mediu. Ndërkohë, vizita e kryetarit të Partisë Demokratike në SHBA përkon me 25 vjetorin e rivendosjes së marrëdhënieve diplomatike mes Shqipërisë dhe SHBA.

Por kush do të jetë tema e bisedimeve në axhendën e takimeve që kreu  demokratëve do të zhvillojë në SHBA?

“Sfidat e Shqipërisë për ndërtimin e një demokracie funksionale dhe shtetit të së drejtës si zbatimi i reformës së Dekriminalizimit, zgjedhjet e lira dhe të ndershme dhe reforma në drejtësi do të jenë në qendër të axhendës së kreut të opozitës në SHBA. Por po kështu pritet që gjatë takimeve me zyrtarët e lartë amerikanë të diskutohet edhe për qendrimet e Partisë Demokratike për nxjerrjen e Shqipërisë nga kriza dhe për programin dhe alternativeë qeverisëse të demokratëve”.