Bashkia e Tiranës pritet të ndihmojë të paktën 2 mijë të pastrehë, pasi do të japë 2 mijë kredi të buta në vitin 2017.

Kreu i Bashkisë, Erion Veliaj për këtë arsye bëri të ditur se pavarisisht se qeveria ka bllokuar proçesin e dhënies së kredive të buta, institucioni që ai drejton se do të përdorë fondet e saj, për të rihapur proçedurën.

“Duke filluar nga viti tjetër, Bashkia e Tiranës do të vendosë një milion dollarë për dhënien e 2 mijë kredive të buta, çka do të bëjë të mundur që bankat të gjenerojnë mbi 60 milion dollarë në tregun imobiliar, kurse 2 mijë familje të reja do të marrin apartamentin e tyre në Tiranë, ndonëse qeveria qendrore e ka pezulluar programin e kredive të buta për shkak të abuzimeve që kanë ndodhur në të kaluarën, ku deputetë dhe drejtorë të rëndësishëm merrnin kredi të buta. Bashkia e Tiranës, duke qenë se i ka sistemuar financat e veta, do ta fillojë e pavarur nga qeveria qendrore projektin e kredive të buta,” tha Veliaj.

Lajmin e mirë kryebashkiaku e publikoi gjatë inagurimit të ambienteve të reja të konviktit tek një shkollë elektronike.
Veliaj shtoi se Bashkia e Tiranës është e vendosur të lirojë të gjitha konviktet e zëna nga familjarët, qofshin këto për nxënësit e arsimit të mesëm, ashtu edhe për studentët, ndaj u ka bërë thirrje të gjithë atyre që kanë zaptuar ambiente të tilla t’i lirojnë ato dhe të përfitojnë nga mundësitë që ofron bashkia nëpërmjet programeve të strehimit social.