Vendimi i fundit i Qeverisë së Kosovës për vendosjen e taksës në masën 100% edhe për brendet ndërkombëtare që prodhohen në Serbi dhe Bosnje ka shqetësuar Bashkimin Europian. Përfaqësuesja e Lartë për Politikë të Jashtme, Federica Mogherini dhe Shefat e Misioneve të BE-së në Kosovë, kanë lëshuar një deklaratë duke i kërkuar qeverisë së Prishtinës që të rishqyrtojë vendimin dhe të revokojë tarifat e vendosura ndaj mallrave.
“Vëmë re me shqetësim vendimin e Kosovës për të zgjeruar tarifat e importit 100 për qind edhe për produktet e markave të njohura ndërkombëtarisht të vendeve të tjera, duke përfshirë vendet e BE-së, që prodhohen në Serbi dhe Bosnje e Hercegovinë. Ne duam të përsërisim mesazhin e BE-së se vendosja e tarifave nuk kontribuon në marrëdhëniet e fqinjësisë së mirë"-deklarojnë krerët e misioneve të BE.

Në deklaratë thuhet se ky vendim bie në kundërshtim me angazhimet e kaluara të Kosovës ndaj integrimit rajonal dhe angazhimet e nënshkruara të MSA-së, ndërsa krerët e misioneve të BE i bëjnë thirrje qeverisë së Kosovës që të rishqyrtojë vendimin për zgjerimin e tarfiave .
“Ky do të ishte vendimi i duhur që duhet ndërmarrë për avancimin e Kosovës dhe popullit të vet, për aspirata evropiane për të tashmen e të ardhmen. Ne kujtojmë edhe njëherë mesazhin e BE-së për bashkëpunim rajonal dhe u kërkojmë të gjitha palëve të përmbahen nga veprimet që minojnë këtë mesazh”-thuhet në deklaratën e ndërkombëtarëve.