Më 29 shtator Silvio Berlusconi ka vendosur ti bëjë vetes një dhuratë të veçantë: ekipin e Monza-s. Njoftimi për blerjen e 70% të klubit, është planifikuar për ditëlindjen e 82-të: po organizohet një festë e madhe që do të kulmojë me njoftimin. Negociatat po vazhdojnë dhe Galliani po sistemon detajet e fundit me familjen Colombo.

Edhe pse nuk janë deklaruar zyrtarisht, shifrat e marrëveshjes mund të kapin shifrën 2 milion euro. Pjesa e mbetur e aksioneve do të qëndrojë në duart e presidentit aktual Nicola Colombo, i cili e ka shprehur vetë dëshirën për të qëndruar brenda klubit. Dhe kërkesa e tij është pranuar, siç duket. Për më tepër që palët e njohin njëri-tjetrin, duke parë që Nicola është i biri i Felice Colombi që ka qenë pronari i Milan-it nga viti 1977 deri në vitin 1980, dhe raportet janë të tilla që nuk shfaqen probleme.
Ndërkohë në qytet ka shumë entuziazëm: abonimet në javën e fundit, që prej fillimit te negociatave, janë rritur. Shifra ka arritur në 600 anëtarë, një rezultat fantastik për një ekip që aktivizohet në Serie C.