Akoma pa u harruar sulmi terrorist në Manchester, Britania e Madhe është goditur nga një tjetër sulm.

Plot 6 persona mbetën të vdekur dhe të paktën 48 të tjerë u plagosën, në incidentin e radhës terrorist në ishull, këtë herë në Londër, aty ku 3 agresorë u qëlluan për vdekje nga policia.

Kanë mjaftuar 8 minuta që kryeqyteti britanik të tmerrohet.

Gjithçka nisi me një kamion të bardhë që mori përpara këmbësorët në “London Bridge”, rreth orës 22 të mbrëmjes së djeshme, me orën lokale, përpara se 3 personat të dilnin në rrugë dhe të godisnin me thikë njerëzit pranë tregut “Borough”.

Policia njoftoi se 3 agresorët mbanin veshur veshje të rreme kamikazi. Njëri prej të plagosurve është oficer policie, i cili pësoi plagë nga mjeti i ftohtë prerës pasi shkoi në ndihmë të qytetarëve. Megjithatë, plagët nuk ia rrezikojnë atij jetën.

Më shumë se 80 mjete të emergjencave u dërguan në vendngjarje dhe të plagosurit, disa prej të cilëve në gjendje kritike, janë duke marrë trajtimin e duhur mjekësor në 5 spitale të kryeqytetit britanik.

Ndihmëskomisioneri i Policisë Metropolitane, Mark Rowley tha se aktualisht besohet se ishin vetëm 3 agresorë të përfshirë dhe se veshjet me eksplozivë që mbanin të veshura ishin të rreme. “Jemi duke e trajtuar këtë incident si terrorist dhe po kryhet një hetim i plotë”, shtoi ai.

Ky është sulmi i tretë terrorist që godet Britaninë e Madhe në 3 muaj, pas sulmit me makinë dhe thikë në “Westminster” në muajin mars, ku mbetën 5 persona të vdekur, si dhe shpërthimeve në “Manchester Arena” më pak se dy javë më parë, ku vdiqën 22 persona.