E shkarkuar me numra rekord dhe aktualisht më e përdorur se Twitter, Pokemon Go thjesht po bën namin. Madje jehona e saj është e tillë sa jo vetëm lojtarët, por edhe bizneset po mundohen ta shfrytëzojnë në ndonjë farë mënyre. Rasti më i njohur është ai britanik ku lokale dhe restorante të ndryshme po paguajnë që të bëhen destinacione ku përdoruesit e Pokemon Go të mund të gjejnë pokemonët e tyre.

Bizneset po paguajnë 100 sterlina në ditë që këto krijesa virtuale të gjenden në territoret e tyre, për të futur këto lojtarë në dyert e tyre. Por jo vetëm kaq, pasi që tani kemi shembujt e parë të suksesit. Një restorant në Londër tregon se fitimet e saj janë rritur me 26% që kur filluan të paguajnë në Pokemon Go. Lojtarët e lojës së famshme jo vetëm që janë futur në dyert e tyre për të kapur pokemonët, por gjithashtu kanë konsumuar në një vlerë totale prej 70 mijë stërlinash. Pra me pak fjalë, investimi është i garantuar.

Kjo nuk është gjithçka! Pokemon Go tashmë kanë edhe stadiumin e tyre personal. Pikërisht ashtu! Së fundmi klubi prestigjoz gjerman Wolfsburg, ka hapur dyert e stadiumit të saj Volkswagen Arena deri më datën 30 korrik. Përgjatë ditëve të ardhshme të gjithë përdoruesit e kësaj loje do të mund të futen lirisht në stadium, nga terreni sportiv e deri tek tribunat, për të gjetur dhe kapur pokemonët që mund të gjenden në këtë territor. Me pak fjalë, pokemonët po pushtojnë botën.