Zv.kryeministri Erion Braçe në takimin e zhvilluar këtë mëngjes në Kryeministri me drejtuesit e Zyrave të Punës, Shërbimit Social, Inspektoriatet e Punës dhe Sigurimet Shoqërore ka qenë i ashpër dhe ultimativ.
Newsbomb.al mëson se Braçe e ka thirrur këtë mbledhje që në 8:00 të mëngjesit dhe u ka bërë një ‘dush të ftohtë’ drejtuesve mbi objektivat mujore të arritura.
Braçe e ka nisur me kryeinspektorin e Inspektoriatit të Punës, Arben Seferin duke i pohuar se në një kontroll ‘blic’ të disa ditëve më parë, në zyrën e punës në Durrës nuk ka gjetur askënd në krye të detyrës, thonë burimet për newsbomb.al.
"Dua ta nis me ju z.Kryeinspektor i inspektoriatit! Më dt.5 mars ora 8:10 isha në zyrën e inspektoratit të punës në Durrës për inspektim, aty gjeta vetëm një grua në tavolinën e punës. 8 punonjësit e tjerë përfshirë drejtuesin mungonin, ishin në kafe me siguri, i prita 10 minuta asnji nuk erdhi”, ka thënë Braçe në mbledhje, sipas burimeve të sigurta të newsbomb.al.
Zv.kryeministri ka pohuar se Inspektoriati i Punës në Durrës do shkrihet i gjithi.
“Jo pa qëllim këtë takim e thërrita në orën 8:00 në Kryeministri zotëri! Orari zyrtar për të gjithë punonjësit e këtij shteti nis në orën 8:00. Kryeinspektor! Ajo zyrë do shkrihet e gjitha! Do bëhet nga e para, brenda Marsit, mbledhjen tjetër nuk dua justifikime! Ata punonjës që rrinë në kafe leri të prehen në kafe! Nuk i duam! Qartë?!" është shprehur në mënyrë ultimative Braçe në mbledhje.
10 Nov 2024 
