Instituti për Zhvillim e Arsimit ka hartuar udhëzimin në lidhje me ndryshimet që do të pësojë programi mësimor, në kuadër të nismës 3 lëndë në 6 orë. 

Në udhëzimin, që IN News ka siguruar argumetohet se kjo ndërhyrje duhet bërë, pasi numri i madh i lëndëve që nxënësit zhvillojnë brenda një dite, sjell ngarkesë.
Edhe pesha e çantave që duhet të mbajë një fëmijë e tejkalon raportin peshë çantë për peshë trupore është tjetër arsyetim.
Po koha e pamjaftueshme për të shpjeguar një mësim është një faktor që ka bërë që qeveria të ndryshonte oraret mësimore, pasi gjykojnë se në shumë raste gjatë 45 minutave, për zhvillimin e disa lëndëve, mësuesit “marrin kohë” nga pushimet midis orëve.
Në udhëzim renditen dhe përfitimet që sjell forma e re e organizimit të orarit mësimor, ku shkruhet se nxënësit kanë mundësi të përvetësojnë më mirë njohuritë dhe të zhvillojnë aftësitë e tyre, pasi do të jetë më e madhe koha në dispozicion për zhvillimin e detyrave dhe të veprimtarive të ndryshme. Po kështu ata do të kenë mundësi të aktivizohen dhe të vlerësohen më shumë gjatë mësimit.
Është menduar gjithashtu që do reduktohen detyrat e shtëpisë dhe se do përgatiten për një numër më të vogël lëndësh për ditën e nesërme.
Po nëse shohim një orar paraprak të klasës së 3-të që sugjerohet në udhëzim kuptojmë se që në nisje hartuesit s’ja kanë dalë dot, pasi vetëm disa lëndë janë vendosur të bëhen dy orë dhe të tjerat vetëm nga një orë.