“Kryeministri i Shqipërisë pro-BE do të fitojë shumicën parlamentare”. Ky është titulli i shkrimit të “The Guardian” .  “Kryeministri i Shqipërisë, artisti i kthyer në politikan Edi Rama, është gati të rimarre pushtetin pas zgjedhjeve parlamentare të konsideruara si çelësi i perspektivave të ardhshme të vendit për anëtarësimin në BE”-nis shkrimi i botuar në të përditshmen prestigjoze.  Edhe “Financial Times” shkruan se “Partia Socialiste ka fituar një shumicë të drejtpërdrejtë në zgjedhjet parlamentare, të cilat konsiderohen si një provë e angazhimit të vendit ballkanik për uljen e korrupsionit dhe rimarrjen e momentit për të filluar bisedimet e pranimit në BE, ndoshta deri në fund të vitit”.  Edhe “Reuters” shkruan se “Kryeministri Edi Rama i kërkoi votuesve t'i jepnin një mandat në votimin e së dielës që do ta ndihmonte të qeveriste i vetëm në mënyrë që të përshpejtoheshin reformat anti-korrupsion në gjyqësor, e kërkuar kjo nga BE”.  Por “Reuters” rendit edhe problematikat si akuzat për blerje vote, dhe pjesëmarrjen e ulët në votime “Vetëm 45 për qind e votuesve të regjistruar morën pjesë në zgjedhje, pjesëmarrja më e ulët që nga zgjedhjet e para demokratike të Shqipërisë në vitin 1992”- përmendet në shkrim. Për sa u përket premtimeve, thuhet se Rama është zotuar të hapë bisedimet zyrtare të pranimit në BE deri në fund të vitit, si dhe të luftojë korrupsion dhe të reformojë drejtësinë.  Ndërkohë  artikulli i “The Guradian” flet në brendësi për premtimet e kryeministrit Rama gjatë fushatës ndërsa përmend edhe ato me të cilat erdhi në qeveri në vitin 2013.  “Rama, i cili bëri fushatë për një biletë të integrimit të mëtejshëm me Perëndimin, është zotuar të vazhdojë me reformat, duke përfshirë një rishikim rrënjësor dhe të degëve të sistemit të drejtësisë.”-shkruan The Guardian, e cila kujton se në vitin vitin 2013, Rama premtoi se do të hiqte gjyqtarët e korruptuar dhe do të zgjidhte të drejtat e pronësisë . Në artikull përmendet edhe fakti se kryeministri shpesh ka luajtur me kartën e ‘nacionalitetit”. The Guardian i kushton vëmendje edhe krizës politike në të cilën u fut vendi pas bojkotit të Parlamentit nga ana e Partisë Demokratike dhe akuzave të bëra prej saj për korrupsion të nivelit të lartë dhe prodhimit të drogës në vend. “Vetë Rama u zotua përpara votimit se do të ketë prioritet çrrënjosjen e prodhimit të kanabisit. Fushat e kanabisit janë rritur pesëfish gjatë vitit të kaluar, sipas departamentit të shtetit të SHBA dhe reputacioni në rritje i Shqipërisë si narko-shtet fillestar shihet si një pengesë tjetër për shpresat e anëtarësimit në BE”-shkruan kjo media. Sipas saj “Në një vend ku paga mujore bruto vitin e kaluar ishte rreth € 340 (£ 300) dhe ku një e katërta e të rinjve thuhet të jenë të papunë, prodhimi i drogës është bërë një shtyllë ekonomike”.