Në ditën e votimeve janë regjistruar disa ngjarje që kanë shkaktuar habi. Disa vajza kanë braktisur ceremoninë martesore për disa minuta për të votuar. Nuset e veshura me vellot e ceremonisë kanë preferuar të kalojnë më parë në qendrat e votimeve para se të shkojnë te burrat. Pas votueses me vello nga qyteti i Fierit, një tjetër nuse nga Tirana ka shkuar të bëjë detyrën qytetare. Ndërkohë një tjetër nuse nga Elbasani ka shkuar në qendrën e votimit e veshur me të bardha dhe e shoqëruar nga bashkëshorti i saj. Edhe një çift nga qyteti i Durrësit, ka gjetur kohë të votojë, duke iu “përgjigjur” kështu apelit për pjesëmarrje në votime.
Duket si e çuditshme por është e vërtetë. Banorët e fshatit Grabovë e Sipërme në bashkinë Gramsh kanë bojkotuar votimin. Lajmin e konfirmon edhe kryetari i KZAZ në Gramsh i cili deklaron se qendra është hapur normalisht, komisionerët janë paraqitur por asnjë votues nuk ka hyrë brenda të votojë. Ndërkohë banorët kanë bërë të ditur se arsyeja e bojkotit është mungesa totale e investimeve në këtë zonë.
Një rast i pazakontë votimi është shënuar ditën e sotme në qytetin e Vlorës. Një qytetar është paraqitur për të votuar në qendrën ku kishte emrin në listë por ka zbuluar se dikush ka votuar më herët për të. Ngjarja ka ndodhur në njësinë e votimit në lagjen “1 Maji” të qytetit të Vlorës, ndërsa 59-vjeçari ka mësuar se emri i tij rezultonte të kishte votuar më herët gjatë ditës. Menjëherë shtetasi F.S, 59 vjeç, ka denoncuar rastin.