Në një koment të shkurtër mbi të ardhmen e tij në stolin e Shqipërisë, trajneri Xhani de Biazi thotë se do të respektojë kontratën, duke lënë gjithsesi hapur edhe ndonjë mundësi marrëveshjeje të re.

“Të paktën deri më 31 tetor do të jem trajner i Shqipërisë, më pas të shohim”, – ka thënë ai gjatë një evenimenti bamirësie në Milano.

Më pas, tekniku kuqezi ka analizuar kampionatin italian dhe Champions League.

“Napoli-Juve? Ka qenë një ndeshje e madhe, e luajtur mirë nga të dy ekipet. Napolit i ka munguar vetëm goli i dytë, ndërsa bardhezinjtë kanë vuajtur pak për shkak të golit të shpejtë që kanë shënuar, janë ndier më shumë të qetë se duhet.

Ndeshja e së mërkurës në Kupën e Italisë do të jetë një histori tjetër. Higuain? Ka shënuar shumë gola, nëse ndalet ndonjëherë vetëm sa bëhet më njerëzor, sepse shpesh duket si marsian”.

“Juventus po punon për të arritur në maksimumin e formës për ndeshjen e Champions League kundër Barcelona-s. Belotti? Po rritet dhe mund të përmirësohet akoma. Po fiton shumë eksperiencë. Nuk e di nëse do të ketë dëshirë të largohet, do ta shohim në vazhdim. Donnarumma? Është i jashtëzakonshëm, shumë i ri, një gabim mund t’i ndodhë kujtdo. Ka qetësinë e një veterani”.