Trajneri holandez Franc De Boer u prezantua me premtime të mëdha dhe u konsiderua si një zgjedhje personale e drejtuesve të rinj, që nuk i kishin punët mirë me Roberto Mançinin.

Megjithatë, pa lojtarë si Kandreva, Zhoao Mario e Gabigol, të cilët së bashku kanë kushtuar rreth 100 milionë euro, Interi vjet ishte në vendet e para në renditje dhe të paktën deri në janar dukej një skuadër shumë solide dhe kërcënuese për Juventusin.

Pikërisht Juventusi është përballë në fundjavë dhe tashmë duket si një udhëkryq për De Burin, i cili nuk mund të justifikohet më me nevojën për kohë, apo si tha pas ndeshjes kundër Hapoelit Beer Shevas të enjten: “Luajtëm mirë, por sapo pësuam gol e humbëm krejtësisht toruan. Këtë gjë nuk di ta shpjegoj”.

Ndonëse duket e pamundur të ndodhë kaq shpejt, mediat italiane shkruajnë se “dashuria” mes Interit dhe holandezit është zbehur dhe një disfatë në Derbin e Italisë mund të sjellë një revolucion të ri në drejtim, aq sa tashmë flitet edhe për Fabio Kapelon si kandidat për stolin zikaltër.