Departamenti Amerikan i Shtetit i bën thirrje Prishtinës dhe Beogradit që të tregohen krijues dhe elastikë në gjetjen e një zgjidhjeje për normalizimin e marrëdhënieve mes dy vendeve. Në një deklaratë për Zërin e Amerikës, Departamenti i Shtetit thotë se “tani është koha që palët të jenë krijuese dhe elastike. Zgjidhja duhet të vijë prej tyre dhe vetë ata të mbajnë përgjegjësi për të. Shtetet e Bashkuara janë të gatshme të dëgjojnë dhe të ndihmojnë palët në gjetjen e një zgjidhjeje të përbashkët.”
Departamenti i Shtetit thotë se normalizimi i plotë i marrëdhënieve mes Serbisë dhe Kosovës është thelbësor për stabilitetin rajonal. Ai do të hapte gjithashtu një rrugë të qartë për të dy vendet drejt anëtarësimit në Bashkimin Evropian.
“Shtetet e Bashkuara, thuhet në deklaratë, mbështesin fuqishëm dialogun e lehtësuar nga BE-ja ndërmjet Beogradit dhe Prishtinës.”
Komentet e Departamentit të Shtetit pasojnë idetë e hedhura së fundi për ndarjen tokësore të Kosovës e deri te shkëmbimi i territoreve, që nënkupton që veriu i Kosovës me shumicë serbe t'i bashkohet Serbisë në shkëmbim për luginën e Preshevës, një rajon me shumicë shqiptare në jug të Serbisë .Deri tani idetë e tilla nuk janë hedhur në kuadër të bisedimeve dhe janë kundërshtuar nga komuniteti ndërkombëtar, për shkak të rrezikut për ndikimin që mund të kenë më gjerë në rajonin e Evropës Juglindore, që ende po rimëkëmbet nga luftërat e përgjakshme të viteve të 90-ta të shekullit të kaluar. Bisedimet ndërmjet të dyja palëve pritet të rifillojnë në shtator dhe do të duhej të çonin në një marrëveshje gjithëpërfshirëse detyruese ligjore për normalizimin e marrëdhënieve ndërmjet Kosovës që ka hyrë në vitin e 11-të të pavarësisë, dhe Serbisë që vazhdon ta kundërshtojë atë.