Atletico Madrid ka fituar 1-0 ndaj Arsenal në “Wanda Metropolitano” dhe është kualifikuar për në finalen e Europa League me rezultatin përgjithshëm 2-1, e cila do të luhet në Lion.

Në minutën e fundit të pjesës së parë, Diego Costa shënoi vendimtar për Atletico. Sulmuesi spanjoll tundi rrjetën pas pasimit të marrë nga Antonie Griezmann dhe ky ishte goli i tij i katërt në shtatë ndeshje të luajtura kundër “topçinjve” në karrierën e tij.

Atletico Madrid nuk kishte trajnerin Diego Simeone, si pasojë e skualifikimit për përjashtimin nga fusha në ndeshjen e Londrës, ndaj ky eliminim do të thotë se Arsene Wenger i mbyll 22 vitet në stolin e “topçinjve” pa asnjë trofe në Europë.

Olympique Marseille është skuadra e dytë finaliste e këtij edicioni të Europa League. Edhe pse me shumë vuajtje skuadra e Rudi Garcias eliminoi pas kohës shtesë Salzburgun duke i shuar ëndrrën futbollistit të përfaqësues së Kosovës Valon Berisha për finalen e madhe të këtij kompeticioni. Nuk do të ketë një tjetër finale pas asaj të humbur ndaj Interin në 1994-ën në Kupën UEFA për skuadrën austriake.

Salzburgu bëri gjithçka për të përmbysur humbjen 2-0 të ndeshjes së parë. Në Red Bull Arena vendasit triumfuan 2-0 duke e çuar ndeshjen në shtesë falë rrjetës së Haidaras dhe autogolit të Sarr, por në shtesë qëndërmbrojtësi portugez Rolando, 4 minuta para fundit shfrytëzoi asistin e Payet duke çuar në finale Marseille për inatin edhe të të gjithë tifozëve të Lyonit pasi finalja do të luhet në këtë qytet.