14 Marsi e gjen kryeqytetin me një pamje të re. Bashkia e Tiranës ka menduar për dekorin e po ashtu për argëtimin e qytetarëve, që zgjedhin të kalojnë Ditën e Verës në kryeqytet. 

Muzikë, art, lojra dhe argëtim janë kryefjala e 14 marsit, Ditës së Verës në kryeqytet. I gjithë kryeqyteti duke nisur nga bulevardi “Dëshmorët e Kombit”, parku “Rinia”, lulishtja tek sheshi “Skënderbej”, sheshi “Nënë Tereza” si  dhe zona tek Blloku do të kthehen në arenë festive ditën e 14 marsit.

Kështu duke nisur prej orës 09:00 të mëngjesit të ditës së sotme do të çelet panairi EKO në sheshin “Nënë Tereza”, risi e këtij viti, ku kompani lulesh si dhe disa sipërmarrje riciklimi do të krijojnë një kopësht të madh në shesh si dhe do të promovojnë punimet e tyre të realizuara nga mbetjet urbane.

Pjesë e kësaj feste tradicionale tashmë janë edhe fëmijët.

Kështu rreth 1000 fëmijë të veshur më uniforma të gjelbra dhe kafe, do të vendosen në formën e një peme nën moton “Jeto Eko, Festo Eko” dhe do të parakalojnë nga Kryeministria në drejtim të Sheshit “Nënë Tereza”.

Ansambli i Tiranës, Teatri i Kukullave, Cirku i Tiranës gjithashtu janë pjesë e festimeve të 14 marsit, ku kanë parashikuar performanca të ndryshme argëtuese për fëmijë dhe të rritur.

Bashkia e Tiranës në bashkëpunim me biznese të ndryshme Ditën e Verës ka organizuar edhe koncerte të ndryshme, ku është parashkuar ngjitja në skenë e DJ dhe këngëtarëve më të njohur të momentit.

Ndërkohë edhe në kryeqendren e festimeve të Ditës së Verës, në Elbasan, janë përgatirtur për festimet e kësaj dite. Që në orët e para të mëngjesit, mijëra qytetarë janë mbledhur në sheshin “Aqif Pasha” për të ndjekur koncertin e mundësuar nga bashkia e këtij qyteti.

Në qytetin e Elbasanit festa e vërtetë e verës është në momentin e ndërrimit të stinëve, në mesnatën e datës 13 mars. Kjo festë me rrënjë të thella pagane është kthyer në një ditë të rëndësishme për këtë qytet që Ditën e Verës e shikon edhe si një mundësi të mirë për të rritur turizmin dhe të ardhurat.