Trafikantët e lëndëve narkotike gjejnë gjithmonë mënyra për të transportuar “mallin” e tyre. Por jo gjithmonë kanë sukses, pasi kanë rënë në prangat e uniformave blu. Këtë “fat” kanë patur dy transportues të cannabis sattiva me një kamion. Policia Kufitare e Kapshticës ka sekuestruar në serbatorin e një kamioni 92 kg kanabis sattva dhe ka arrestuar në flagrancë dy shtetas. Të arrestuarit janë 51-vjeçari Artur Yzeiri, banues në fshatin Ravonik dhe 55-vjeçari Astrit Haxhi, banues në Korçë.
Arrestimi i tyre u bë pasi, gjatë kontrollit me qen antidrogë, në vijën e dytë në dalje, ku mjeti tip kamion i markës “Scania” me targa AA630 KO, u përzgjodh për kontroll të detajuar, u krijuan dyshime se në pjesën e serbatorit të mjetit ishte fshehur lëndë narkotike.
Kontrolli ka vijuar edhe me procesin e skanimit të kryer nga Dogana, ku në një vend të përshtatur, pikërisht tek pjesa e serbatorit u evidentuan 18 pako të mbështjella me letër natriban, me peshë 92 kg. Pakot kishin brenda kanabis, që u sekuestrua në cilësinë e provës materiale.