Performanca e shumëpritur e Eleni Foureira në Eurovision ishte një ndër më të zjarrtat dhe sigurisht nuk kishte si të ndodhte ndryshe.

Me një veshje të punuar me detaje rrjete dhe yje që mbulonin vetëm pjesët intime, duke mos i lënë vend imagjinatës, Eleni e "dogji" dhe një herë skenën në Eurovision.

Por, përveç prezantimit të saj dinjitoz, ajo që ra në sy ishte dhe një fakt mbi origjinën e saj, i shkruar në ekranin e Tel Aviv.

Sipas ‘MyHaritage’ që është një kompani që realizon testin e ADN-së për të zbuluar origjinën, rrënjët familjare, Eleni ka rezultuar 68.9 % me origjinë nga Greqia dhe nga Italia e Jugut.

“Fakt familjar nga Eurovision. Rezultatet nga ‘My haritage’ të Eleni tregojnë se ajo është 68.9 % nga Greqia dhe Italia e Jugut.”- është shkruar në ekranin e Eurovision 2019 gjatë performancës së këngëtares që përfaqëson Qipron.

Lidhur me këtë lajm këngëtarja ka folur në një intervistë duke u shprehur e habitur për rezultatin.

“Italiane? Nuk e kisha idenë! Jam pothuajse 70% greke? Unë nuk jam greke, unë jam rritur në Greqi, por ndihem greke. Nga Italia Jugore? Nuk di çfarë të them…”, u shpreh këngëtarja pasi mësoi rezultatet e testit të ‘My Heritage’.

Siç dihet Eleni ka emigruar në një moshë shumë të vogël në Greqi, por me origjinë është nga Fieri dhe vetëm vitet e fundit e ka pranuar origjinën e saj shqiptare.