Një çift austriakësh, që kishin zgjedhur Shqipërinë për të kaluar pushimet e verës kanë kaluar një makth të vërtetë në Fushë-Arrëz.

Ditën e djeshme, rreth orës 23:30, ata kanë qenë duke pushuar anës rrugës në Fierzë, ku persona të paidentifikuar i kanë zënë pritë dhe i kanë grabitur.

Mësohet se ata kanë marrë 700 euro dhe një celular. Të frikësuar, çifti me inicialet K.T. 61 vjeç dhe E.T. 54 vjeçe kanë kallëzuar sot herët në mëngjes rastin.

NJOFTIMI I POLICISE

Më datë 19.08.2017,  jemi njoftuar nga salla operative e Komisariatit Policisë Tropojë, se në orën 08:30 të datës 19.08.2017, janë paraqitur dy shtetas të huaj E. T, 54 vjeçe dhe bashkeshorti K. T, 61 vjeç, banues në Vjenë, Austri, për të bërë kallzim.

Nga hetimet paraprake të kryera ka rezultuar se në fshatin Fierzë, Njësia Administrative Fierzë, Bashkia Fushë Arrëz, me datë 18.08.2017, rreth  orës 23:30, këta shtetas kanë qënë duke pushuar në anë të rrugës automobilistike kur dy shtetas të paidentifikuar u  kanë marrë me dhunë  një sasi parash prej 700 Euro dhe një telefon celular.

Menjëherë janë nisur forcat e Komisariatit të Policisë Tropojë dhe grupi hetimor i Komisariatit të Policisë Pukë për sqarimin e rrethanave të ngjarjes.

Janë ngritur pika të shumta kontrolli për identifikimin dhe kapjen e autorëve të kësaj ngjarje.

Po punohet intensivisht për zbardhjen e ngjarjes.