Një prej sektorëve që nuk ka ndierë shumë krizën dhe ka rritur të ardhurat në 6 muajt e parë të vitit është ai fason. Kjo për shkak se shumica e mallrave kanë treg të sigurt pasi dergohen jashtë vendit. Sektori i fasonëve i solli ekonomisë shqiptare 219 milionë euro ose 10% më shumë se në 6 muajt e parë të 2018. Raporti është publikuar nga Banka e Shqipërisë.

Sipas të dhënave mallrat me porosi janë aktiviteti kryesor ku mbështeten eksportet shqiptare. Vetëm sektori tekstile dhe këpucë zë rreth 43% të eksporteve.
Me sa duket fasonët i rezistuan mirë dekadës së krizës dhe nuk e ndijen as konkurrencën globale të tregjeve të Azisë dhe Afrikës Veriore, ku krahu i punës është edhe më i lirë.
Në total, ekonomia shqiptare përfitoi në gjysmën e parë të vitit 2019, 554 milionë euro nga shërbimet e eksportuara ku veç fasonëve kontribuoi dhe turizmi. Pra pjesën kryesore të këtyre të ardhurave e sollën turizmi dhe fasonët.
Gjithësesi deficit i llogarisë korrente të vendit këtë vit është përkeqësuar ndjeshëm, për shkak të përkeqësimit të bilancit në tregtinë e mallrave. Deficiti arriti në 517 milionë euro, me rritje prej rreth 50% krahasuar me një vit më parë. Ndikimin kryesor e ka dhënë sektori energjetik, ku rënia drastike e prodhimit ka stopuar eksportet dhe ka rritur ndjeshëm importet.