Policia e Shtetit njoftoi marrjen masave shtesë për të garantuar sigurinë publike përgjatë ditëve festive të fundvitit.

Masat e shtesë janë ndërmarrë në pritje të rritjes së numrit të shtetasve që hyjnë e dalin nga territori i vendit, rritje të numrit të mjeteve në qarkullim, zhvillim të aktiviteteve festive, por edhe përdorim të lëndëve piroteknike.

Policia e Shtetit thotë se përmes këtyre masave synon rritjen e sigurisë në komunitet në të gjithë territorin e vendit, parandalimin e ngjarjeve kriminale, evidentimin dhe kontrollin e personave me precedentë kriminalë dhe mbajtja e tyre nën vëzhgim, rritje të efikasitetit të shërbimeve policore, identifikimi dhe kapja e personave në kërkim, sigurimi dhe parandalimi i ngjarjeve kriminale, rritja e pranisë policore në akset rrugore për të shmangur aksidentet si dhe forcimi i masave dhe kontrollit ndaj subjekteve që tregtojnë fishekzjarre.

Strukturat e Policisë do të analizojnë dhe rivlerësojnë informacionet për identifikimin e autorëve të ngjarjeve kriminale kundër jetës e pronës, për konflikte për motive të ndryshme, persona në kërkim, si dhe të organizojnë operacione për kapjen e tyre, duke angazhuar edhe Forcat e Ndërhyrjes së Shpejtë.