Supozohej se do të ishte si dasmat e tjera, me atmosferë festive, por një dasmë në fshatin Radostinë të Fierit, për pak sa nuk është kthyer në tragjedi.

Një konflikt mes të ftuarve, ka degjeneruar në përdorimin e mjeteve prerëse (thikës), dhe si rrjedhojë, 3 persona kanë mbetur të plagosur.

Sipas policisë së Fierit, më datën 17.08.2016, në orën 17:20 , në fshatin Radostinë, në lokalin e D.F ku po zhvillohej një ceremoni martese, A. Bajrami, 21 vjeç dhe K.Pashko, 33 vjeç, gjatë një konflikti për motive të dobëta, kanë goditur me mjet prerës Lavderim Sulën 54 vjeç, Albert Sulën 19 vjeç dhe Gezim Nuredini 25 vjeç, të tre banues në Radostinë.

Policia ka ndaluar autorët e plagosjes, ndërsa shtetasit e dëmtuar ndodhen në Spitalin Rajonal Fier jashtë rrezikut për jetën.

Nuk dihen rrethanat e sakta të ngjarjes, por policia po punon për sqarimin e plotë të saj.