Mandatit të kreut të VMRO-DPMNE Nikolla Gruevskit, për krijimin e qeverisë së re të Maqedonisë po i vjen fundi. Kur mbeten vetëm 3 ditë nga përfundimi i afatit të bisedimeve, marrëveshja duket ende larg. Kryesia e BDI-së nuk është mbledhur për të diskutuar takimin e liderit Ali Ahmeti me Nikolla Gruevskin e VMRO-së dhe Zoran Zaevin e LSDM-së. Ndërkohë mësohet se Ahmeti ka zhvilluar një ditë më parë takime kokë më kokë me anëtarët e kryesisë, pa dhënë detaje për temën e diskutimit. Nënkryetarja e BDI-së Teuta Arifi thotë se BDI nuk përjashton koalicionin me asnjë prej forcave politike, gjithmonë duke u nisur nga fakti se ka një përgjegjësi akoma më të madhe. Analistët thonë se nëse VRMO-ja nuk arrin të krijojë qeverinë e re, do të mundohet të thellojë krizën. Ndërkohë eurodeputetët dhe raportuesit për Maqedoninë, kanë bërë thirrje për arritje të një marrëveshjeje. Eduard Kukan, Knut Flekenshtajn dhe Ivo Vajgl, së bashku me Komisionerin e BE-së për Zgjerim, Johanes Han, kanë lëshuar një deklaratë të përbashkët ku shprehen se zgjedhjet e 11 dhjetorit janë hap i rëndësishëm për tejkalimin e krizës politike në Maqedoni. Diplomatët në Bruksel u kanë bërë thirrje liderëve politik për të gjetur, në respektim të plotë të afateve ligjore, bazë të përbashkët për të formuar një qeveri të qëndrueshme dhe të përgjegjshme.