Zjarre masive kanë përfshirë jugun e Francës duke detyruar mijëra banorë që të evakuohen. Raportohet se deri më tani janë evakuuar rreth 10 mijë persona dhe për fat të mirë nuk raportohet për viktima.

Mediat franceze bëjnë me dije se 12 zjarrfikës dhe 15 oficerë policie kanë pasur vështirësi në frymëmarrje. Ekspertët kanë përllogaritur se në total është djegur një sipërfaqe prej më shumë se 4 mijë hektarë.

Që prej ditës së hënë kur nisi përhapja e flakëve e deri në këto momente, në terren janë angazhuar më shumë se 4 mijë zjarrfikës, automjete të shumta, helikopterë dhe mjete të tjera ajrore që ndihmojnë për të depërtuar në zona të thella.

Zjarret kanë prekur edhe rajone turistike përfshirë qytetin bregdetar të Saint Tropez si dhe ishullin e Korsikës.

Flakët e përhapura me shpejtësi kanë rrezikuar disa resorte, ndaj autoritetet kanë evakuuar me shpejtësi një numër të konsiderueshëm turistësh.