UEFA zbeh entuziazmin e kombëtares Shqiptare, ende pa u bërë 24 orë nga fitorja 1 me 0 përballë Rumanisë. Mësohet se UEFA ka hapur procedurat disiplinore kundër Shqipërisë dhe Rumanisë për “pushtimin e fushës” nga tifozët dhe ndriçimin e stadiumit nga hedhja e fishekzjarrëve.
Mësohet se shkaku i hetimit janë akuzat për hedhjen në fushë të sendeve të ndaluara gjatë ndeshjes. Tifozët e dy ekipeve kanë hedhur fishekzjarre teksa dy përfaqësueset po luanin në fushën e blertë. Sipas UEFA-s Shqipëria do të hetohet edhe për zbritje të tifozëve në fushë. UEFA ngarkon me përgjegjësi Federatën Shqiptare dhe atë Rumune për sjelljen e tifozëve gjatë ndeshjes në Lion të Francës.
Ndërkohë, tifozët rumunë ndezën fishekzjarrë menjëherë pasi himni i tyre u këndua në stadiumin e Lionit në nisje të ndeshjes së futbollit. UEFA nuk ka saktësuar se kur paneli disiplinor do të gjykojë rastet.