Federata e Futbollit të Kosovës ka bërë të ditur se futbollisti i njohur shqiptar, Valdrin Mustafa, është infektuar me koronavirus. Mustafa momentalisht është lojtar i Hannover 96. Momentalisht, ai ndodhet bashkë me familjen në karantinë dhe është në gjendje të mirë shëndetësore. “Federata e Futbollit e Kosovës njofton se futbollisti i Kombëtares U21 të Kosovës, Valdrin Mustafa ka rezultuar pozitiv me koronavirus Covid-19. Gjendja e tij është e mirë por është në karantinë me gjithë familjen e tij në Sarbruken. Valdrin Mustafa tani është futbollisti i ekipit të parë të Hanoverit. Presidenti Agim Ademi ka kontaktuar me Valdrinin dhe e ka inkurajuar atë që të qëndrojë i qetë në shtëpi dhe ta kalojë edhe këtë sfidë me durim e kurajë dhe pa panik, duke i uruar shërim sa më të shpejtë”, njofton FFK. 

Në një lidhje direkte në Klan Kosova,Valdrini ka treguar se kur e ka kuptuar që është i prekur nga kjo pandemi dhe si e ka përjetuar lajmin.

“Unë lajmin e kam kuptuar në mëngjes dhe në një far mënyre e kam pritur sepse kam qenë i bllokuar në gjoks dhe fyt”.

“Jam testuar të shtunën në mëngjes, ka ardhur mjeku dhe më ka testuar. Ka qenë një test i zakonshëm. Pastaj lajmin se jam i prekur me COVID-19, ma kanë kumtuar përmes telefonit”.

“Kam pasur pak panik, babi ka qenë në punë – unë kam ndenjur në dhomë derisa e qetësova veten dhe pastaj ju tregova familjarëve. Besoj se virusin e kam marrë në Hanover duke lozur me futbollistë të tjerë”.

“Ilaçet do të vijnë nesër – jam në kontakt me mjekë dhe ata nesër do t’i sjellin ilaçet. Ata më kanë kërkuar që të pushoj dhe ta qetësoj veten. Tash jam në karantinë për 14 ditë”.