Mënyra e keqe e të ushqyerit, abuzimi me cigare dhe alkool ka bërë që në vendin tonë të shtohet numri i pacientëve në spitale. Numri i të prekurve nga sëmundjet të zemrës, tumoret apo dhe hipertensioni në 5 vitet e fundit është rritur me 3 herë më shumë. Po nëse do kryenim aktivitet fizik situata, thonë ekspertë do ishte më mirë.

OBSH, ka publikuar një të dhënë aspak optimiste në lidhje me kryerjen e ushtrimeve fizike, pasi 45 % të popullsisë në Shqipëri kanë raportuar se nuk bëjnë fare fiskulturë. Në studim në lidhje me aktivitetin fizik në popullatë u përfshinë banorë e 168 shteteve në botë, ku Shqipëria dhe Ballkani, renditen në një nivel mesatarisht negativ. 
Sipas OBSH, në të gjithë botën më shumë se 1.4 miliardë të rritur po e vënë veten në rrezik të lartë të sëmundjeve vdekjeprurëse vetëm për shkak se nuk merren me sport. OBSH thekson se një e treta e grave dhe një e katërta e meshkujve në mbarë botën janë në vijën e "rrezikut” për jetën vetëm prej mungesës së aktivitetit fizik.
Në studim sqarohet se mungesa e aktivitetit të rregullt fizik ul rrezikun e dëmeve në shëndet, duke përfshirë sëmundjen kardiovaskulare, disa lloje të kancerit dhe diabetit, si dhe çrregullime të shëndetit mendor. OBSH rekomandon që çdo i rritur të bëjë të paktën 150 minuta stërvitje “me intensitet të moderuar” si ecje të shpejtë, çiklizëm, not çdo javë ose 75 minuta aktivitet intensive të drejtuar nga një profesionist.