Paja ka kërkuar jo pak por plot 46 mijë euro për shkak të mosrealizimit të kontratës që dy palët kanë pasur me njëra tjetrën.

Të gjithë e mbajmë mend spotin televiziv ku Gaz Paja shfaqet për të reklamuar karburantin e cilësinë e Bolv Oil, por duket se pronarët e karburantit, nuk kanë qenë korrekt me pagesat e tyre për aktorin, shkruan newsbomb.al.

Në çështjen që është regjistruar për shqyrtim në gjykatën e Lartë, kërkuesi Gazmend Paja kërkon detyrimin për pagimin e shumës 1100 euro, që rrjedh nga mospërmbushja e detyrimit kontraktor për pagimin e shërbimeve dhe kamatat ligjore mbi këtë shumë deri në ditën e ekzekutimit të vendimit. Kërkohet edhe detyrim për pagimin e shumës 46 mijë euro, si dëm i shkaktuar nga zgjidhja e parakohshme dhe e njëanshme e kontratës si dhe kamatat ligjore mbi këtë shumë deri në ditën e ekzekutimit të vendimit, raporton newsbomb.al.

Kërkesa është bërë në datën 9 janar të këtij viti në gjykatën e lartë dhe konstatohet sipas kërkuesit mospërmbushje e kontratës së shërbimit të qershorit 2014 e nënshkruar mes dy palëve, nga ana e sipërmarrësit të kundërpaditur dhe aktorit.