Prej ditësh po qarkullon lajmi se Lorik Cana mund të jetë trajneri i ri i Kukësit. Në fakt, prej disa ditësh presidenti Safet Gjici ka filluar tratativat për të sjellë në stolin e veriorëve ish kapitenin e kombëtares shqiptare.

Ashtu siç konfirmon edhe “Sport Ekspres”, oferta e Kukësit është bërë dhe tani gjithçka mbetet në dorën e Lorikut. Për të do të ishte eksperienca e parë si trajner, por kjo nuk duket se e shqetëson Safet Gjicin i cili kërkon një emër të madh për ekipin e tij.

Cana ka një karrierë të pasur si futbollist, pasi ka luajtur për shumë vite me Paris Saint Germain, Marsejën dhe Nantes në Francë, me Sunderlandin në Angli, Lazion në Itali dhe Galatasarayn në Turqi. Me kombëtaren shqiptare ka luajtur plot 93 ndeshje, duke qenë kapiteni i skuadrës edhe në Euro.