Policia greke goditi një rrjet shumë të madh të trafikut të drogës, që vepronte në qendër të Athinës. Agjentët e policisë kanë vënë në pranga 97 persona, pjesa më e madhe e të cilëve dyshohet të jenë shtetas shqiptarë. Fitimet e këtij grupi nga trafiku i drogës vlerësohen, sipas policisë, deri në 19 milionë euro, shumica e të cilave dyshohet se janë sjellë në Shqipëri. Zëdhënësi i policisë, greke Kristos Papazafiris, deklaroi se drejtuesit kryesorë të grupit janë gjithashtu shtetas shqiptarë, ndërsa kreu i rrjetit ndodhet aktualisht në Shqipëri. Mediat greke raportojnë se koka e organizatës është gjithashtu i dyshuari kryesor për egzekutimin e një shqiptari, ngjarje kjo e ndodhur në Greqi më datën 13 nëntor. Ai njihet me emrin e koduar “Gendi” dhe është i shpallur në kërkim. Pjesa më e madhe e antëarëve të organizatës kriminale ka rënë në pranga të policisë gjatë aksioneve që policia greke ka organizuar më 25 dhe 26 nëntor. Në 45 kontrolle të ushtruara në banesat e të arrestuarve u gjetën dhe u sekuestruan rreth 4440 kg kanabis, 30.000 euro para cash, 10 automjete, dy motoçikleta, një furgon, dy pershore etj. Policia deklaroi se përveç drogës së sekuestruar gjatë aksioneve, grupi ka trafikuar gjithsej 1,5 ton kanabis, 16 kg kokainë, 500 gr heroinë. Të arrestuarit e tjerë janë me kombësi greke, bullgare, rumune dhe afrikane.