Rreth orës 14:45 minuta  tre persona të maskuar dhe të armatosur kanë grabitur me armë në aeroportin Nënë Tereza. Deri tani  burime nga policia kanë bërë të ditur se autorët e maskuar dhe të armatosur kanë hyrë brenda postës së avionëve pasi prenë menteshat e portës së jashtme që ndodhet nga krahu i rrugës Rinas – Fushë Krujë.  Makina ka thyer postbllokun e policisë që është vendosur në aeroportin e Rinasit, ku në fakt që prej ditës së djeshme janë shtuar edhe masat e sigurisë në këtë objekt të rëndësisë së veçantë. Më pas makina me personat e armatosur dhe të maskuar, kanë shkuar tek avioni dhe kanë rrëmbyer çantat me para. Grabitësit kanë hyrë në pistën e avionëve dhe kanë grabitur një sasi monetare, qe po transferoheshin me mjetet e SHPSF “Nazeri 2000”, nga terminali drejt avionit. Pas kësaj mjeti është drejtuar për në fund të zonës së pistës së avionëve duke çarë rrethimin dhe duke ikur për në drejtim të Fushë Krujës. Gjatë ndjekies së autorëve policia ka gjetur të djegur mjetin tip “Benz”, që dyshohet se u përdor nga autorët.Pas kësaj, grabitësit e kanë braktisur makinën dhe i kanë vënë flakën mjetit, duke humbur gjurmët. Forcat RENEA po ushtrojnë kontrolle në akset rrugore dhe zonat ku dyshohet se strehohen autorët. Vazhdojnë intensivisht kërkimet dhe hetimet për zbulimin dhe kapjen e autorëve dhe zbardhjen e plote të ngjarjes. Raportohet se rruga drejt Aeroportit është bllokuar, ndërkohë policia e shtetit nuk ka dhënë asnjë njoftim zyrtar deri tani. Ja si transportoheshin paratë në Rinas pak kohë më parë.