Alban Ramosaj dhe Beatrix Ramosaj mesa duket kanë vendosur të kalojnë së bashku pushimet e tyre në Greqi.

Nëpërmjet Instastories ata kanë shpërndarë momente nga udhëtimi, mirëpo kur kanë arritur në Selanik u ka ndodhur e papritura.

Në disa postime në ‘Instastory’, Albani dhe Beatrixi kanë zbuluar se disa persona kanë thyer xhamin e makinës së tyre dhe kanë marrë të gjitha gjërat me vlerë dhe pasaportat dhe dokumentat e tyre.

Ditën e sotme, në një prononcim ekskluziv për Blitz.al, Alban Ramosaj ka treguar më shumë rreth asaj ngjarjeje:

“Falë Zotit nuk ka ndodhur diçka më e rëndë e jemi shëndoshë e mirë. Ironikisht kaluam mjaft mirë, pavarësisht grabitjes (qesh). E vetmja gjë që më ngacmon kuriozitetin është pse pasaportat? Dhe në ç’formë mund të keqpërdoren? Policia na tregoi që në të njëjtën natë rreth 8 makina të tjera ishin grabitur dhe vetëm pasaportat ishin vjedhur. Uroj të jetë mbyllur me kaq dhe të mos ketë vazhdim ky episod.”

Më tej Albani ka sqaruar edhe arsyen e vonesës së policisë, duke hedhur poshtë dyshimet se shkaku mund të ishin targat shqiptare.

“Duke qenë se u gjendëm në Selanik në periudhë festive dhe pushimi, autoritetet përkatëse duket se mundoheshin të rrinin në shpirtin e festës. Ky ishte dhe shkaku i neglizhencës dhe reagimit të ngadaltë ndaj telefonatave dhe vizitave në rajone policore të ndryshme. Nuk u vëmë faj, të gjithëve na pëlqejën ditët e pushimit. Falë zotit nuk ishte aksident rasti ynë se kushedi si do përfundonte situata” u shpreh Albani.