Dy të mitur, motër e vëlla, që prej 6 prillit kanë mbetur vetëm. E ëma i ka braktisur 8 vjet më parë dhe i vetmi informacion që kanë për të është se ajo ndodhet në Kosovë, ndërsa të atin e kanë humbur në fillim të muajit prill, kur forca të policisë e kanë arrestuar. Të miturit kanë shkuar në televizionit “News24”, për të kërkuar strehim. Ata kanë rrëfyer se jetonin me babanë e tyre në një shtëpi me qira, në Kamëz, por gjithçka ndryshoi në mbrëmjen e 6 prillit, kur babai i tyre u arrestua.
Fëmijët thonë se që nga ai moment nuk kanë asnjë informacion për të atin. Ata tregojnë se policia iu trokiti në derë dhe iu tha do ta merrnin pak babain e tyre për të bërë një deklaratë dhe nuk do të vonohet më shumë se një orë. Por drama vijoji, i ati nuk u kthye dhe ata nuk dinë më asgjë për të.
Të miturit kanë folur dhe për nënë e tyre duke thënë se në momentin e braktisjes ajo kishte marrë me vete dhe motrën e tyre të vogël, disa muajshe në atë kohë. Sipas tyre motra duhet të jetë 8 vjeç. Ata dinë vetëm se e motra mund të jetë në një nga Shtëpitë e Fëmijës. Babai i tyre u martua sërisht, por meqë njerka e tyre i dhunonte ai e ndau edhe atë.
Ata të trembur, me duart e shtrënguara dhe me lot në sy, nuk kërkojnë gjë tjetër vetëm një strehim dhe të bashkohen me motrën e tyre të vogël.
Fëmijëve iu erdhi menjëherë në ndihmë Shërbimit Social Shtetëror, që do të kujdeset dhe për akomodimin e tyre në një nga qëndrat për fëmijët, në Tiranë.
Urojmë shumë, që tani fati tu buzëqeshë këtyre të miturve!