Çfarë është më e rëndësishme që një takim mes 2 njerëzve të funksionojë? Ka rëndësi pamja? Aroma trupore? Apo t’i besojmë klishesë që thotë se mbi të gjitha karakteri dhe shpirti?

Këtë herë, në rubrikën ‘Anabel Lab’ tek “Hostel by Anabel” u zhvillua një test për të parë nëse një djalë është i aftë të zgjedhë të njëjtën vajzë nga pamja ashtu edhe nga biseda.

Testi u realizua përmes 3 fazave. Në fazën e parë, Dea Mishel i tregoi djalit fotot e 3 vajzave dhe Redi duhet të zgjidhte atë që e tërhiqte më tepër.

Mes Kleas, Borës dhe Albanës ai zgjodhi Albanën.

Faza e dytë ishte ajo e aromës. Me sytë mbyllur përqafoi 3 vajzat një nga një dhe zgjodhi atë që sipas tij kishte aromën që e tërhiqte më tepër.

Ndonëse ishte mes Albanës dhe Kleas, zgjodhi Klean, duke argumentuar se aroma e saj ishte më afër njerëzores. Faza e tretë dhe e fundit ishte ajo e komunikimit.

Të ulur me shpinë nga njëri tjetri, Redi duhet të pyeste vajzat për të kuptuar më shumë rreth botëkuptimit të tyre, por pa i parë në asnjë moment.

Si është marrëdhënia e tyre me meshkujt, çfarë vlerësojnë tek një njeri dhe interesa të tjera personale.

Krejt rastësisht ai zgjodhi përsëri vajzën e parë, Albanën duke na vërtetuar kështu se është kaq e mundur që një njeri të ketë pamjen që të bën për vete dhe vyrtytet që ke vlerësuar gjithnjë tek individi.