Një sëmundje e rëndë i ka marrë jetën ish zyrtares së lartë të LSI Luzhiana Abazi. Ish drejtoresha e njohur e LSI-së e cila deri në 2016 mbante postin e Drejtoreshës së Fondit të Sigurimit të Detyrueshëm të Kujdesit Shëndetësor. Abazi vuante nga një sëmundje e rëndë dhe u nda nga jeta në moshën 47 vjeçare. Nga viti 2012 e ne vazhdim ajo ishte anëtare e Kryesisë e Lëvizjes Socialiste për Integrim dhe është dalluar për angazhimin e spikatur në politikë.
Miq të shumtë kanë përcjellë mesazhe ngushëllimi në rrjetet sociale për humbjen e saj.
Zyrtarët më të lartë të LSI kanë shprehur ngushëllime për këtë humbje të parakohshme, mes tyre dhe kryetarja LSI Monika Kryemadhi:
Monika Kryemadhi:
“Nuk mund të shkruaj, ka orë që mundohem por është vështirë. Luzhi u largua fizikisht sot nga ne, duke na lënë një dhimbje dhe boshllëk të pazëvendueshëm. Energjia dhe dashuria që ajo na dhuronte pa kushte do të na mungojë gjithmonë. Ndoshta sëmundja e rëndë ja doli të të mundë përkohësisht, por ti do jesh engjëlli që do na shohësh e do kujdesesh për ne, siç ke bërë gjithmonë. E dashur motra ime, mikeshë e zemrës dhe e betejave tona, do të jesh gjithmonë pjesë e imja, në ditë të vështira dhe të mira. Sepse askush nuk mund ta zëvendësojë forcën dhe kurajën që vetëm ti dije të na jepje si askush”.