Ish-kapiteni i Kombëtares Shqiptare, Lorik Cana ka dhënë sot mbështetjen për liderin e AKK-së, Ramush Haradinaj, i cili mbahet i burgosur në Francë si pasojë e një urdhër arresti nga Serbia.

Një futbollist me ndikim të madh në Francë, ku ka luajtur për shumë vite me skuadrat më të njohura, Cana i ka bërë thirrje autoriteteve të këtij vendi që të lirojnë Haradinajn.

“Dua të jap mbështetjen time të të plotë për Ramush Haradinajn, i cili edhe njëherë po ndërshkohet nga një urdhër arresti ndërkombëtar i lëshuar nga Serbia dhe i motivuar politikisht për akte për të cilat Haradinaj është shpallur i pafajshëm nga Gjykata Ndërkombëtare”, shprehet Cana.

Lorik Cana ka luajtur gjatë karrierës së tij për PSG, Marseille dhe Nantes në Francë, duke krijuar një reputacion të mirë në këtë vend.