Drake dhe J.Lo do të bënin gjithçka që duhej për të promovuar muzikën e tyre së bashku, edhe të përkëdheleshin në Instagram. Bukuroshja 46 vjeçare postoi foton e famshme ku ishte mbështjellë në krahët e reperit 30 vjeçar, dhe më pas Drake bëri të njëjtën gjë. Asnjë nga të dy nuk i vunë mbishkrim fotos, duke e lënë publikun që të spekulonte mbi çfarë po ndodhte, qoftë kjo një romancë e re apo thjesht publicitet për muzikën mbi të cilën po bashkëpunojnë. Dhe natyrisht që spekulimi kryesor do të binte mbi romancën pasi kur shihen pamje të tilla vështirë se i bie njeriu në mendje për muzikën. Kjo nuk është fotoja e parë e tillë që dyshja ka postuar, pasi dy javë më parë artistja latine bëri publike një foto të Drake që e kishte vizituar në shtëpinë në Las Vegas. Edhe këtë foto Drake e postoi, këtë herë me një emoji me zemra në vend të syve. E gjitha kjo u shoqërua dhe nga veprimi i Rihanna, e cila ndaloi së ndjekuri J.Lo në Instagram. Përfaqësues nga të dyja palët kanë refuzuar të komentojnë. Një lojë e ndërtuar mirë, ndoshta pak më mirë se ç’duhet.