Ai vetë është shprehur se ditëlindja e tij, data 16 qershor,  përkon me datat kur luhen europianet apo botëroret, por nuk e ka imagjinuar asnjëherë se do ta festonte me Shqipërinë në një kompeticion kaq prestigjoz. Sigurisht që një rezultat pozitiv ndaj Francës, do të ishte dhurata më e bukur për De Biasin, por tekniku Italian dëshiron si dhuratë një kualifikim ndaj Rumanisë. Erdhi në kombëtaren tonë në vitin 2011-të, por nuk erdhi vetëm, na solli shumë lojtarë që bashkë me De Biasin, realizuan ëndrrën e miliona shqiptarëve, duke konkretizuar punën e tyre të palodhshme për të marrë pjesë në finalet e France 2016. Federata Shqiptare e Futbollit ka publikuar disa foto të festimit të ditëlindjes së 60-të të trajnerit të kuqezinjve. Në këtë festë ishin të pranishëm të gjithë futbollistët e kombëtares, si dhe presidenti i FSHF-së, Armand Duka. Urojmë De Biasin për ditëlindjen, urojmë t’i plotësohet dëshira duke shpresuar për një fitore ndaj Rumanisë.