Zëvendëspresidenti i Shteteve të Bashkuara të Amerikës, mbërriti mbrëmë në Kosovë, pas vizitës në Serbi. Ai sot do të takohet me presidentin Hashim Thaçi dhe kryeministrin Isa Mustafa, takim ky që do të pasohet edhe nga një konference për mediat.

Çështja e dialogut me Serbinë pritet të jetë një prej temave që nënpresidenti amerikan Joe Biden do ta diskutojë me presidentin dhe kryeministrin e Kosovës, në takimet e veçanta. Mësohet se të njëjtën çështje ka hapur edhe në bisedimet me kryeministrin serb Vuçiç në Beograd.

Normalizimi i marrëdhënieve ndërmjet dy vendeve vlerësohet si çështja më e rëndësishme që do të ndihmojë edhe stabilitetin përgjithësisht në rajon dhe do të ruajë perspektivën evropiane për Ballkanin Perëndimor.

AXHENDA

Ai sot do të takohet me sot në orën 09:00 me kryeministrin Isa Mustafa dhe në orën 09:45 me presidentin Hashim Thaçi. Takimet me krerët e shtetit do mbahen pa praninë e mediave në selinë e Kuvendit.

Në orën 10:30 Biden do të vizitojë manastirin e Graçanicës.

Në orën 11:00 eshte parashikuar një konference shtypi e Zëvendëspresidentit Biden me Presidentin Hashim Thaçi.

Ndërsa Joe Biden takohet me zyrtarët e shtetit të Kosovës, gruaja e tij Jill do të vizitojë Manastirin e Graçanicës, ku do të takohet me peshkopin Teodosije.

Pasdite rreth ores 14:00 bashkëshortët Biden së bashku me nipin dhe mbesën e tyre do të marrin pjesë në emërimin e rrugës nacionale Gjilan-Ferizaj, e cila tani e tutje do të mbajë emrin e Joseph R. “Beau” Biden, III.

Në këtë ceremoni të organizuar nga Qeveria e Kosovës do të mbajnë fjalime nënpresidenti Joe Biden, presidenti Hashim Thaçi, kryeministri Isa Mustafa dhe kryetari i Gjilanit, Lutfi Haziri.

MASAT E SIGURISE

Policia e Kosovës ka njoftuar lidhur me masat e sigurisë, që do të ndërmerren sot me rastin e vizitës së zëvendëspresidentit amerikan, Joe Biden në Kosovë. Sipas Policisë, në intervale të caktuara kohore, do të ketë edhe ndalim të përkohshëm për qarkullim në disa rrugë, prandaj do të përdoren rrugë alternative.

Ja në cilat rrugë do të ketë ndërprerje të përkohshme të qarkullimit: Me datën 17.08.2016 nga ora 08:00 do të ndalohet për qarkullim rruga “Agim Ramadani” nga Sllovenia Sport deri te rreth-rrotullimi te ish Gjykata e Qarkut prapa Komunës, rruga e UÇK-së deri te udhëkryqi me rrugën “Migjeni”.

Gjithashtu edhe sheshi “Ibrahim Rugova” deri te sheshi Skënderbeu do të jetë i bllokuar nga ora 08:00 deri në largimin e personalitetit. Në rajonin e Ferizajt, rruga Bibaj – Dardani dhe anasjelltas do të jetë e ndaluar për qarkullim nga ora 11:00 deri 16:00, të datës 17.08.2016, përderisa zyrtarë policor janë paraparë të orientojnë qarkullimin në rrugën alternative; Gjilan-Kllokot –Viti – Gerlic – Ferizaj dhe anasjelltas, një njësi policore do të vendoset në udhëkryqin e Kllokotit dhe do i orienton/udhëzon qytetaret të cilët destinacion e kanë Ferizajn.