Pas një operacioni policor, është arrestuar Gjorgje Veliçkoviq, ish anëtar i Korpusit të Uzhicës. Në kuadër të finalizimit të këtij aksioni, policia ka gjetur në bodrumin e tij në Aleksinac, Serbi, 22 vjeçaren, Samra Huskaraniq, të cilën Gjorgje e ka rrëmbyer gjatë luftës në Bosnjë në vitin 1995, në zonën e Srebrenicës. Vajza ishte përdhunuar më shumë se 3 mijë herë, jo vetëm nga Gjorgje, por edhe nga miq të tij ish-anëtarë të Korpusit të Uzhicës.

Gjorgje ka pranuar menjëherë se vajzën së pari e ka mbajtur të fshehur në një fshat në rrëzë të Kopaonikut, ndërsa kur gruaja e tij ka vdekur, atëherë ai e ka dërguar atë në bodrumin e tij me qëllim që t’i shërbejë të gjitha dëshirave të tij, raporton revista “BH”. Vajza nuk është ushqyer mirë, është e pistë, me flokët dhe thonjtë të mëdhenj, ndërsa në trupin e saj shihen dhjetëra lëndime dhe gërvishtje.

Për Gjorgje tani pritet burgim i përjetshëm. Në shtëpinë e tij janë gjetur edhe 17 granata dore, dy mitralozë, një bazuke dhe një minahedhëse. Këtë rast policia po mundohet ta mbajë të fshehur deri sa të hetohen të gjitha rrethanat e këtij krimi. Vajza është dërguar në Akademinë Mjekësore Ushtarake.