Cdo punëmarrës i lënduar në vendin e punës, duhet t’i drejtohet gjykatave përkatëse për të kërkuar dëmshpërblim nga punëdhënësi, nëse nuk ka mundësuar kushtet teknike.
Kështu ka deklaruar sot përgjegjësja e sektorit në Inspektoriatin Shtetëror të Punës, Irena Gjoka, gjatë emisionit “KafeIN”.
E pyetur nga moderatori Flavio Qarri, Gjoka tha se gjatë inspektimeve të kryera në vitin 2018 në sektorin e ndërtimit, u vu re se rreth 67 përqind e subjekteve punonin me nënkontraktorë.
“Prej tyre, në gati 20 % të rasteve, mungonte koordinatori për çështjet e sigurisë dhe kujdesit në punë.
Sipas ligjit duhet të ketë supervisor që të koordinojë punën”, tha përfaqësuesja e Inspektoriatit të Punës.
Në lidhje me çertifikimin e punonjësve që punojnë në lartësi, gjatë intervistës u deklarua se vetë, 2-5 % e personave që punojnë në ndërtim, e zotëronin këtë çertifikatë.
Këto fakte u pranuan dhe nga përgjegjësja e sektorit në Inspektoriatin Shtetëror të Punës, Irena Gjoka, e cila tha se kurset e aftësimit për punimet në lartësi janë të detyrueshme sipas ligjit.
“Edhe nëse subjekti ka nënkontraktuar të tjerë për punimet, në raste aksidentesh ai nuk përjashtohet nga përgjegjësia”, tha Gjoka.